Vínculos en Compostela

S3B

Os bens relacionais son elementos vinculados coas conexións que establecen as persoas entre si. Destas interaccións podemos sacar o sustento para o noso crecemento persoal, aínda que á veces non se obteña un resultado positivo. O noso grupo de traballo faise cargo deste tema, centrado na cidade de Compostela. Focalízase en persoas novas, pois o noso círculo está formado pola xuventude universitaria. 

Falaremos con estudantes de diversas facultades de Ciencias Sociais e Ciencias Humanas (filoloxía, económicas, política, historia, filosofía, dereito…). Ademais, contamos cun membro do Gabinete de Comunicación da USC para que aporte o seu punto de vista sobre a aparición dos estudantes nos medios.

Queremos dar voz ao estudantado e que conten as súas experiencias dende que chegaron á universidade. Para isto, organizaremos coloquios onde os membros destas facultades poderán ofrecer a súa opinión abertamente. Como estudantes, sabemos a importancia que ten a nosa formación académica para conseguir os nosos obxectivos persoais e profesionais. Pretendemos que os universitarios expresen os seus problemas dentro dos centros e a súa perspectiva respecto á cidadanía, pois nos medios de comunicación non está moi presente a súa situación. 

Tentaremos analizar os vínculos que se establecen entre o alumnado: a formación de novas relacións nun entorno novo, o compañeirismo nas aulas, o contacto durante as festas e as relacións que van máis lonxe dunha  amizade. Tamén é preciso avaliar as relacións da mocidade co resto de ámbitos da cidade, como o transporte público, a saúde, o aluguer dos pisos ou as residencias universitarias. Ademais, un dos propósitos que queremos acadar é a participación do alumnado nas actividades promovidas pola facultade, tales como deportes ou estudo de linguas.

Pretendemos estudar a visión do estudantado sobre o profesorado universitario: o trato que existe entre o claustro e o alumnado e a percepción destes sobre os educadores e educadoras. Tamén queremos ver os plans de futuro dos universitarios e saber se se senten preparados e preparadas para o mundo laboral. Un punto a considerar son os obstáculos que se atopan no camiño da súa formación, se experimentan algunha motivación polos seus estudos e que melloras cren necesarias para mellorar os rendementos.

Como obxectivo principal da acción gustaríanos continuar co labor desenvolvido polo observatorio, aumentando a presenza nos medios dun colectivo xeralmente desprazado. Pretendemos atopar e dar a coñecer os diferentes vínculos, non só entre o alumnado, senón tamén co profesorado. Difundiremos a visión dos estudantes da institución da USC e por último intentaremos resolver as problemáticas atopadas nos círculos. Para a acción, pensamos nunha pequena presentación do observatorio na entrada da facultade, na que participasen os membros do círculo. Servirá para dar a coñecer como se establecen os bens relacionais e acadar unha difusión cada vez máis ampla entre o público.

 

Ligazóns:

• Calveiro, P. (18 de febreiro de 2019). Los universitarios suspenden al servicio de autobús. La voz de Galicia. Recuperado de:  https://www.lavozdegalicia.es/noticia/santiago/2019/02/18/universitarios-suspenden-servicio-autobus/0003_201902S18C1995.htm
• Europa Press (8 de febreiro de 2019). Reunión dos alcaldes de Santiago e Palma para propoñer límites ao prezo do aluguer. Galicia Confidencial. Recuperado de:  http://www.galiciaconfidencial.com/noticia/85500-reunion-alcaldes-santiago-palma-proponer-limites-prezo-aluguer
• Montero, T.  (25 de xullo de 2017). Las residencias de la USC tienen casi dos solicitudes por cada plaza. La voz de Galicia. Recuperado de:  https://www.lavozdegalicia.es/noticia/santiago/santiago/2017/07/24/residencias-usc-dos-solicitudes-plaza/0003_201707S24C1995.htm