É un problema a desmotivación do profesorado?

SOBRINO PLATAS

Cafetería Recantos

Cando un ou unha estudante de grao comeza a súa etapa na universidade aínda non coñece de todo o profesorado, as materias nin o ambiente entre a mocidade. A maioría do alumnado ten unha motivación e unha vocación cara a profesión que desempeña a carreira que están a comezar. Aquí xoga un papel importante o labor do persoal docente.

As faltas de asistencia do profesorado ás aulas son un problema nalgunhas facultades. En base a unha nova (El Correo Gallego, 3 de setembro de 2018), Xisela Casal, estudante de dereito, falou sobre o persoal docente da súa facultade: “Hai unha desmotivación xeneralizada no profesorado, e esa desmotivación acaba sendo transmitida ao alumnado”.

Por outra banda, Roberto Castro, membro do Gabinete de Comunicación da USC, opinou que os educadores e as educadoras están a levar a cabo unha metodoloxía de ensino diferente: “Están intentando facer clases nas que o profesor non sexa o gran experto que fala no púlpito, senón que sexan os alumnos protagonistas da clase”. Ademais, Roberto rexeitou o tratamento que se daba na peza informativa de El Correo Gallego: “Nesta nova a fonte di que prefire manterse no anonimato”. Ademais, dicía: “Este feito réstalle credibilidade á noticia”.  Xisela, pola súa parte, considerou que malia que a nova non citaba as fontes, no seu caso era certo: “Na facultade de dereito son moi frecuentes os casos de profesores que non van ás clases e mandan cada vez un substituto diferente, polo que os alumnos temos cada semana un profesor distinto”, comentaba. Para controlar isto, a USC implantará un control de horario a todo o seu persoal (El Progreso, 11 de xaneiro de 2019)

Coloquio na cafetería Recantos. De esquerda a dereita: David Sobrino, Ígor Mella, Xisela Casal e Brandán Otero

Ígor Mella, bolseiro de pedagoxía na Facultade de Ciencias da Educación da USC, explicou que nunca tivo ningún problema coa asistencia dos docentes ás aulas, aínda que recoñecía o seguinte: “Moito profesorado non se deixa ver moi a miúdo polas facultades. Se teñen docencia luns e martes non volven pisala. Pero tampouco se lles esixe”. No caso de Nerea González, estudante de Filoloxía Hispánica, sucedía algo similar ca no de Ígor: “Na miña facultade é raro que haxa ausencia de profesores. Algunha vez si avisan ou mandan un correo se teñen que cancelar ou cambiar unha clase por un problema puntual, pero non adoita pasar”.

Malia isto, o círculo de Bens Relacionais concordou en que non se debe xeneralizar nestes casos. Por outra parte, afirmaron que parte do persoal docente da universidade mira pouco polos seus alumnos. Nerea falaba do método de ensino do profesorado: “Dedícanse simplemente a que te presentes a un exame e vomites a materia que intentaron explicarche”. Ígor, a favor das palabras de Nerea, aseguraba que é culpa do sistema, que non valora a calidade do ensino: “É a docencia que non se valora e se certifica automaticamente simplemente por anos. Sen máis, sen importar a calidade”.

Outro dos temas tocados na reunión foi o da desmotivación do alumnado. Algúns universitarios e universitarias comezan a estudar un grao pero non teñen a motivación suficiente, o que fai que parte deste estudantado abandone a carreira (El Correo Gallego, 23 de novembro de 2006). Con todo, existen casos nos que unha materia pode volverse apaixoante para o alumnado a pesar de non ter interese nun principio, tal e como comentaba Nerea: “A min pasoume, estudo a carreira que estou estudando en gran parte por un profesor que tiven”. Xisela engadía: “Cando un profesor é moi bo, nótase moitísimo”, aínda que tamén pensaba o seguinte: “Debe existir un mínimo de interese por parte do estudantado:  “É preciso ter unha mínima vocación de balde”.

Ígor consideraba que é moi importante a motivación por parte dos alumnos. Porén, explicaba: “Non é o rol de ningún profesor recuperar a ninguén”. Roberto concluía que o profesorado inflúe dalgún xeito: “Se o profesor ou profesora é quen de facer unha materia atractiva, mellor. Vai ser enriquecedor para todos e iso convértese nun estímulo”. Con todo, engadía: “A motivación é necesaria nas aulas de instituto pero que na universidade, ao converterse nunha formación optativa, o interese ten que vir do alumnado”. Por tanto, é preciso que a mocidade universitaria teña certa iniciativa para afrontar os seus estudos, pois non son obrigatorios e trátase dunha elección propia.

A acción

Outra das nosas opcións para a acción é a realización dun mapa da cidade de Santiago. Este mapa farase conxuntamente entre os membros do círculo e servirá para sinalar diferentes puntos da cidade que teñan certo interés relacional, así como as rutas de maior afluencia universitaria. Isto servirá para comprender os fluxos de estudantes e tratar de fomentar as conexións entre eles. Ademais, os participantes contarán con diversos símbolos, como xente de compras ou un grupo de amigos e amigas falando. Os participantes poderán colocalos en calquera lugar da cidade, para así representar a importancia deses espazos a nivel relacional, ademais de indicar o tipo de vínculos que se establecen neses lugares.

 

Conversaron connosco:

• • Ígor Mella Núñez, bolseiro de pedagoxía na Facultade de Ciencias da Educación da USC
  • Nerea González Martínez, estudante de Filoloxía Hispánica.
  • Xisela Casal Agrelo, estudante de dereito.
  • Roberto Castro, membro do Gabinete de Comunicación da USC

Ligazóns:

• Casal, I. (23 de novembro de 2006). La USC sigue perdiendo alumnos, pero gana matriculados en primero. El Correo Gallego. Recuperado de https://www.elcorreogallego.es/galicia/educacion/ecg/usc-sigue-perdiendo-alumnos-gana-matriculados-primero/idEdicion-2006-11-23/idNoticia-107429/amp
• M.M.L. (11 de enero de 2019). La USC implantará un control horario a todo su personal que genera polémica. El Progreso. Recuperado de https://www.elprogreso.es/articulo/lugo/usc-implantara-control-horario-todo-personal-genera-polemica/201901111729491353576.html
• Santamaría, U. (3 de setembro de 2018). Denuncian que muchos profesores de la USC apenas pisan las aulas. El Correo Gallego. Recuperado de https://www.elcorreogallego.es/galicia/ecg/denuncian-muchos-profesores-usc-apenas-pisan-aulas/idEdicion-2018-09-03/idNoticia-1135195/