A problemática da vivenda universitaria

OJEA GUTIÉRREZ

Cafetería Recantos

O paso á vida universitaria fai que o estudantado mude as súas propias preocupacións e comece a ter en consideración aspectos que anteriormente tiñan escasa importancia no seu día a día. Por exemplo, a variación dos prezos no aluguer dos pisos é unha problemática en auxe na vida do alumnado, que condiciona a elección entre unha residencia ou un piso. 

Algunhas das medidas que se levan a cabo é ir vivir a pisos que se atopan nos arredores da cidade: “Eu vivín todos os anos nun piso no centro da cidade, pero cando acabei o máster funme para o Milladoiro porque me parece moito máis económico” afirmou Ígor Mella Núñez, bolseiro de pedagoxía na Facultade de Ciencias da Educación da USC.

Pero non só preocupa o prezo, tamén se teñen en conta as condicións das vivendas que, como dixo o propio Ígor: “Non respectan nin a dignidade da xente”. Esta afirmación concordaba cunha nova de La Voz de Galicia (15 de agosto de 2017), na que se recolle que a principal queixa do estudantado é o estado dos pisos que, polo xeral, son vellos e con mobles moi antigos: “Ademais, é algo que está moi interiorizado, pois cando vés aquí buscar un piso tes presente que vai ser un zulo” engadiu Nerea González Martínez, estudante de Filoloxía Hispánica.

Titulares coma este reflicten as dificultades coas que se atopa a mocidade en busca dun fogar. O medo por parte dos propietarios a posibles desfeitas ou a conflitividade dos inquilinos, xunto co aumento do aluguer dos pisos turísticos, conforman os principais impedimentos aos que se enfrontan os mozos e mozas. Sobre isto, Ígor argumentou o seguinte: “Se vas buscar un piso con corenta ou cincuenta anos non che van ensinar os pisos que lle ensinan aos estudantes cando van en agosto”, opinión que compartía Xisela Casal Agrelo, estudante de dereito: “Podo entender que non lle ofrezas o mellor dos pisos e téñaslles outra carta, pero polo menos que teñan un mínimo de decencia de vida”.

Integrantes da reunión cunha das novas a debatir. De esquerda a dereita, Nerea González, Xisela Casal, David Sobrino e Ígor Mella.

Ante esta nova de La Voz de Galicia (25 de xullo de 2017), Xisela apuntou: “O primeiro ano si que é unha boa opción vivir nunha residencia de cara a socializarse e coñecer xente”. Nerea non estaba a favor desta disxuntiva: “Eu non considero que sexa un punto a favor irse o primeiro ano a unha residencia porque creo que unha parte moi importante de ser estudante é vivir fóra da casa e saber buscarte a vida”. Coincidía así co argumento que defendeu Antonio Villasenín Veiras, estudante de Maxisterio: “Obviamente sae máis barato ir a unha residencia pero a min paréceme máis cómodo un piso, porque tes unhas liberdades que non vas ter nunha residencia”.

Outra das alternativas que se formularon foi o uso do transporte metropolitano como unha elección fronte vivir nos lugares de estudo. Ígor, no seu caso persoal, non podía optar por esta opción: “Sería impensable debido á distancia existente entre Santiago de Compostela e a cidade de Lugo”. Aínda así, defendía esta alternativa: “Para quen vive cerca si, penso que se hai unha boa combinación de autobuses eu non o dubidaría”. Pero non só inflúe ter acceso a unha boa conexión de transporte. Para Antonio, tamén hai que ter en conta a flexibilidade horaria: “Hai carreiras nas que non hai horarios fixos xa que ao mellor cambian prácticas ou así cada dúas semanas, cambian horarios ou teñen horarios a mañá e despois ao final da tarde”. Deste xeito, resultaría máis complicado que o estudantado se adaptase aos horarios establecidos: “Poderá ser máis económico pero non che compensa en canto a comodidade”, concluía Nerea.

Unha das conclusións á que se chegou entre os membros desta derradeira reunión foi a imposibilidade de vivir sós durante esta etapa universitaria. Un feito que reflicte, claramente, a importancia dos bens relacionais e a necesidade de aprender a convivir e socializar coas demais persoas que temos ao noso arredor.   

A acción:

Terminadas as reunións, chega a hora de poñerse mans á obra coa acción. Tras un longo período para pensar na opción máis correcta, finalmente decidimos decantarnos pola realización dunha pequena curtametraxe que buscará resolver as problemáticas atopadas nas reunións, ademais de explicar os consensos. Este vídeo servirá como explicación do noso tema, Bens Relacionais, co obxectivo de aumentar o rango de habitantes aos que chega, incrementando así o coñecemento sobre como son as relacións a día de hoxe. Finalmente, a curta será difundida mediante códigos Qr que serán repartidos por distintos puntos da cidade.

Conversaron connosco:

• Ígor Mella Núñez, bolseiro de pedagoxía na Facultade de Ciencias da Educación da USC.
• Nerea González Martínez, estudante de Filoloxía Hispánica.
• Xisela Casal Agrelo, estudante de dereito.
• Antonio Villasenín Veiras, estudante de Maxisterio.

Ligazóns:

• Calveiro, P. (4 de outubro de 2018). El bum de los pisos turísticos engulle la oferta de viviendas para estudiantes. La Voz de Galicia. Recuperado de: https://www.lavozdegalicia.es/noticia/santiago/santiago/2018/10/04/bum-pisos-turisticos-engulle-oferta-viviendas-estudiantes/0003_201810S4C1995.htm
• Montero, T. (25 de xullo de 2017). Las residencias de la USC tienen casi dos solicitudes por cada plaza. La Voz de Galicia. Recuperado de: https://www.lavozdegalicia.es/noticia/santiago/santiago/2017/07/24/residencias-usc-dos-solicitudes-plaza/0003_201707S24C1995.htm
• Presedo, A. (15 de agosto de 2017). Los estudiantes tendrán que pagar hasta un 10% más por un piso este curso. La Voz de Galicia. Recuperado de: https://www.lavozdegalicia.es/noticia/economia/2017/08/15/estudiantes-tendran-pagar-10-piso-curso/0003_201708G15P2991.htm