Quen somos?

O Observatorio Cidadán de Comunicación (OCC) é un medio de comunicación con vocación comunitaria. A nosa meta é informar sobre os asuntos locais cunha perspectiva crítica, lexitimada no dereito a comunicar da cidadanía, dun xeito comprobable e crible;  falar do que sucede na contorna máis próxima fornecendo a acción dunha cidadanía reflexiva e participativa, pero sen a presión das relacións de poder.

O noso alicerce é un xornalismo que comparta voz coa comunidade para que agromen os temas comúns silenciados, os colectivos estigmatizados e as persoas que non teñen un altofalante ao seu dispor. Enfocamos a nosa atención en tratar necesidades e carencias, vivencias e arelas dende as súas fontes protagonistas, sen intermediarios.

A práctica comunitaria reflíctese na idea dun xornalismo das persoas para coas persoas, cos colectivos participando dunha conversa que persegue a pluralidade de voces e a presenza de todo aquel que teña algo que aportar. Santiago de Compostela é o centro de acción para arredar prexuízos e estigmas e achegar  no posible un relato ético, fidedigno, honesto, que atenda ás réplicas e sexa recíproco.